D JuBu isch e bunte Hufe vo junge Lüt, wo ir Burgergmeind Bärn e neue Wind wott dribringe u de Junge wott e Stimm verschaffe. Im Januar 2018 isch zu däm Zwäck e Spezialkommission gründet worde, um die junge Bärnburgerinne u Bärnburger underenang z vernetze u ihne zum eine d Burgergmeind u ihri Tätigkeite nöcherzbringe u zum andere se o z motiviere, dass si sech sälber ir Burgergmeind Bärn ibringe. Im Verlouf vor Zyt si immer meh Agebot u Tätigkeite derzuecho. Die ganze Agebot findsch uf derä Website. Näbe de ursprüngleche JuBu-Events, produziert d JuBu underdesse ihre eiget Podcast „Wär sy mir?“. Zudäm gits e JuBu-Rat, wo sech mit em Politwäse ir Burgergmeind befasst, zwe Sitze im Grosse Burgerrat darf bsetze u o JuBu-Workshops dürefüehrt, wo verschidensti Fragestellige rund um d Burgergmeind behandlet wärde u die Junge ihri Stimm chöi ibringe. Usserdäm gits e JuBu-Pool i däm Persone gsammlet wärde, wo interessiert si, sech i irgend ere Form ir Burgergmeind Bärn izbringe.